Con alas

Book with wings, Anselm Kiefer. FOTO

O libro con alas de Kiefer transportoume a unha tarde fría de inverno infantil que pasei pegadiña á placa eléctrica e cun libro de mitoloxía grega nas mans. Aquelas historias de Dédalos, de labirintos e de deuses e deusas que eran homes e mulleres que parían planetas e aqueles cabalos voadores quitáronme o frío para moito tempo. O libro alado de Kiefer -védelo mellor aqui ten a mesma forza que aquelas imaxes. Ten a dureza do forza imperecedoira dunha páxina que se petrifica no mesmo momento da lectura. Cicais sexa a fantástica combinación da dureza do material con esa irresistible levedade do que serve para voar o que me permite disfrutar da simultaneidade dunha sensación de extrema pesadez ao tempo que dunha liberación case absoluta. Coma se me botasen enriba un océano cuxas augas se volvesen nubes nada mais tocar a miña pel. Unha metáfora moi apropiada para esta realidade absolutamente abafante de xentes reviradamente confundidas e atrofiadas que turran desafiando á propia gravidade dun mundo que inexorablemente vai cara arriba, ou cando menos en dirección contraria. Mentres os maiores e poderosos donos dos discursos esquecidos, inventados, alterados e absolutamente manipulados xogaron a borrar o indeleble estes mozos tomaron nota e nesa polis nova cuxo berce na ninguén será quen de eliminar van gardando todo o que ocorre cada día, porque hai cousas que si que aprenderon. Teñen alas, e teñen a lixereza e a elegancia de desplegalas no momento xusto. Ogallá toda a historia do Minotauro sexa unha comedia.